Madridning “Real” klubi hujumchisi Kilian Mbappe Chempionlar ligasi doirasidagi “Atalanta”ga qarshi o’yinda (3:2) olgan jarohati sabab 2024-yilning qolgan qismini o’tkazib yuborishi mumkin. Bu haqda TyC Sports xabar bermoqda.
Manbaga ko’ra, Kilianning jarohati qay darajada jiddiyligi hali aniqlanmagan. Biroq mushaklarda ozgina noqulaylik bo’lsa ham, futbolchi La Liga doirasidagi “Rayo Valekano”ga qarshi bahsni (14-dekabr) o’tkazib yuboradi.
Shuningdek, 2024-yilgi qit’alararo kubok finalida ham maydonga tusha olmaydi (18-dekabr). Agar jarohat jiddiyligi aniqlansa, Mbappe La Liga doirasidagi “Sevilya”ga qarshi o’yinni ham (22-dekabr) o’tkazib yuborishi mumkin.
Qayd etilishicha, tibbiy ko’rik 11-dekabr kuni bo’lib o’tishi rejalashtirilgan.
Ma’lumot uchun, Mbappe joriy mavsum barcha turnirlarda 21 ta o’yinda maydonga tushib, 11 ta gol urdi va 2 ta golli uzatmani amalga oshirdi.
