Sobiq «Select Group» referisi, 12 mavsum davomida Premyer-liga va Chempionshipda faoliyat yuritgan tajribali hakam Endi Davis «Arsenal» va «Chelsi» o‘rtasidagi bahsda yuz bergan bahsli vaziyatga munosabat bildirdi.
«Har qanday VAR tekshiruvida asosiy nuqta — bu hakamning maydondagi dastlabki qarori va uning jonli muloqotidir. VAR faqat videodalillar hakamning yaqqol xato qilganini isbotlasagina aralashadi.
Bosh hakam Darren Ingland vaziyatni qulay nuqtadan kuzatgan. Uning talqiniga ko‘ra, Rays sakrab to‘pga bosh bilan zarba bermoqchi bo‘lganida, qo‘llarining holati tabiiy kurash harakatining bir qismi bo‘lgan. Hakam bu yerda qoidalarning qo‘pol buzilishini ko‘rmagan.
VAR hakami Jon Bruks ham takroriy lavhalarni ko‘rib, bosh hakamning qarorini tasdiqlagan. Rays o‘z qo‘llari bilan ataylab maydonni to‘sib qolishga yoki tanasini sun’iy ravishda kengaytirishga urinmagan deb topildi. Shu sababli, hakamning penalti belgilamaslik haqidagi qarori o‘z kuchida qoldi», — dedi mutaxassis.
Eslatib o‘tamiz, mazkur uchrashuvda «Arsenal» 2:1 hisobida g‘alaba qozonib, turnir jadvalidagi peshqadamligini yanada mustahkamladi.
