Futbol – bu nafaqat mahorat va texnika, balki xarakter, qat’iyat va ba’zida qo’rquv hamdir. Ayniqsa, raqib hujumchilari uchun maydonning eng xavfli nuqtasi – bu “qonxo’r” himoyachilardir. Bugun siz bilan tarixdagi eng tajovuzkor, qo’rqinchli va qo’pol harakatlari bilan afsonaga aylangan himoyachilar haqida so’z yuritamiz.
1. Vinsent Jons (“Psix”) – Angliya
Bu inson futbol tarixidagi eng ommaviy “bad boy” obrazidir. U o’yin davomida raqibga so’z bilan ham, harakat bilan ham bosim o’tkazgan. U faoliyati davomida 12 ta qizil kartochka olgan. Ko’p hollarda esa raqibga atayin jarohat yetkazgan degan shubhalar mavjud. Vinsent Jons shunchalik mashhur bo’lib ketdiki, futbolni tark etgach, u gangster filmlarida aktyor sifatida faoliyatini davom ettirdi. Ha, u haqiqiy maydon gangsteri edi.
2. Marko Materazzi (Provokatsiya ustasi) – Italiya
Ushbu qahramonimiz 2006-yilgi Jahon chempionati finalida Zidandan qabul qilib olgan zarbasi bilan tarixda qolgan. Ammo Materazzining provokatsiyalari bu bilan tugamaydi. U ko’pincha raqibni ruhiy jihatdan yengishga harakat qilgan. Qo’pol o’yin uslubi va qattiq pressing bilan mashhur bo’lgan.
3. Jaap Stam (Dev) – Niderlandiya
“Manchester Yunayted” va “Milan” safida harakat qilgan bu gollandiyalik himoyachi haqiqiy dev edi. Uning bo’yi, jismoniy kuchi va hech nimadan tap tortmasligi uni raqiblar uchun baloga aylantirgan. U raqibni shunchaki to’xtatib qolmasdi, balki ularni maydondan yo’q qilishga intilardi.
4. Pepe (“Hujumchi” himoyachi) – Portugaliya
“Real Madrid”dagi faoliyati davomida Pepe raqiblarga g’ul-g’ula solish bo’yicha maktab yaratgan deyish mumkin. U to’p uchun kurashda faqat qoidalarga emas, instinktga tayanardi. Uning eng mashhur holatlaridan biri – raqib yiqilganidan keyin unga bir necha bor zarba bergan vaziyatidir. Pepe qattiqqo’l, hissiyotga beriluvchan va juda xavfliligi bilan tarixda qolgan.
5. Roy Kin (Jasoratli “jinoyatchi”) – Angliya
“Manchester Yunayted” sardori bo’lgan Roy Kin o’yin davomida raqibga futbolchi sifatida emas, balki “maydon xo’jayini” sifatida yondashardi. Uning Erling Holandning otasi Alf-Inge Holandga ataylab ishlatgan qo’polligi futbol tarixida nom qozongan. Keyinchalik u o’z intervyularidan birida bu harakatni qasddan qilganini tan olgan.
Xulosa qilib aytganda, ushbu himoyachilar futbolga o’z nomini boshqa tomondan qoldirgan. Ular texnikasi bilan emas, balki xarakteri va agressiyasi bilan afsonaga aylanishgan. Bugungi zamonaviy futbol ancha “silliqlangan” bo’lishi mumkin, ammo bu “qonxo’r” himoyachilarning maydondagi shiddati muxlislar xotirasida abadiy qolgan.
