Angliya Premyer-ligasi 16-turi doirasida “Manchester Siti” va “Manchester Yunayted” o’zaro to’qnash keldi va yakunda mankunianliklar 1:2 hisobida g’alaba qozondi.
Uchrashuvda MYU yarim himoyachisi Bruno Fernandesh penaltidan gol urib, klub rekordini o’rnatdi. Portugaliyalik futbolchi APL o’yinlarida 25 ta penaltidan 21 tasini aniq amalga oshirdi.
Fernandesh bu borada MYU afsonasi Ueyn Runidan o’zib ketdi. Runi “qizil iblislar” safida 28 ta penaltining 20 tasidan unumli foydalana olgan.
Eslatib o’tamiz, MYU APL turnir jadvalida 16-turdan so’ng 22 ochko jamg’argan holda 13-o’rinda bormoqda.
Ma’lumot uchun, Bruno Fernandesh joriy mavsum barcha turnirlarda 24 ta o’yinda maydonga tushib, 6 ta gol va 10 ta golli uzatmani amalga oshirdi. Uning Transfermarkt’dagi narxi 65 million yevroga baholanmoqda.
