O’zbekiston milliy terma jamoasi Jahon chempionati saralashi doirasida KXDR’ga qarshi kurash olib bordi va minimal hisobda g’alaba qozondi.
Uchrashuvdan so’ng tashkil etilgan matbuot anjumanida terma jamoamiz bosh murabbiyi Srechko Katanes ishtirok etdi va o’yin borasida o’z fikrlarini bildirib o’tdi.
“Birinchi bo’limni yaxshi o’tkazdik, raqibda imkoniyat bo’lmadi. Ikkinchi bo’limda Bobur Abduxoliqov vaziyatdan foydalanganida o’yin yengil kechishi mumkin edi.
Himoyalanayotgan vaqtda jarima maydonchasi ichida to’pning qo’lga tegishi bo’lib turadi. Baxtimizga O’tkir Yusupov penaltini qaytardi va biz o’zimizga kerakli natijani qayd eta oldik.
90 daqiqa bir xil o’ynaydigan jamoani topish qiyin bo’lsa kerak, balki 1-2 ta to’p jamoalarni inobatga olmasa. Bugun qiyin sharoitda o’ynadik, yuqori namlik, vaqtdagi farqlar.
Qatarga qarshi o’yinda oxirgi soniyalarda o’tkazib yuborilgan gol futbolchilarning ruhiyatiga ta’sir qilmay qolmasdi. Shunga qaramay, yigitlar o’ziga kelishga muvaffaq bo’ldi.
Tan olish kerak, bugun ayrim yetakchi futbolchilarsiz keldik. Ularning o’rniga tushganlar juda yaxshi o’yin ko’rsatdi.
OFK’ga murojaat qilmoqchi edim. Bunday maydonda o’ynash futbolchilarning sog’lig’i uchun xavfli. Mashg’ulot maydonimiz bundan ham yomon holatda edi. Bu yerdagi tashkiliy qo’mitaga e’tirozim yo’q, faqat maydonni gapirdim.
Futbolchilarga qo’llab-quvvatlash uchun rahmat aytaman. Qatar bilan o’yindan so’ng yaxshi vaziyatda emasdik. Oldingi murabbiy almashinuviga kelsak, bilmayman. Buni rahbariyat biladi.
Hozirgi holatimizga kelsak, mavjud 6 ta o’yin ichidan 18 ochkoning 13 tasini to’plashga muvaffaq bo’ldik. Bizni yana 4 ta o’yin kutmoqda. Endi keyingi 12 ochko uchun harakat qilishimiz kerak.
Futbolchilarga doim kurash oxirigacha bo’lishini aytaman. Ertaroq hal qilamiz degan ruhiyat bo’lmasligi kerak.
Albatta, mundial yo’llanmasini erta qo’lga kiritsak yaxshi bo’lardi. Ammo biz oxirigacha kurashishga tayyormiz. 10 ta o’yinni yutish oson emas, ayniqsa, muhim futbolchilar ishtirok eta olmasa”, – deydi Katanes.
