18-avgust kuni Ispaniyaning Mosexon shahrida niqoblangan noma’lum shaxs futbol maydonida 11 yoshli bolaga pichoq bilan hujum qilgan.
Marca nashrining xabariga ko’ra, Ispaniya vaqti bilan soat taxminan 10:00 atrofida “Angel Tardio” maydonida noma’lum shaxs mashg’ulot o’tkazayotgan bolalardan birini pichoqlagan.
Jarohatlangan bolani evakuatsiya qilish uchun hatto vertolyot ham jo’natilgan. Biroq ko’rsatilgan muolajalarga qaramay, uning hayotini saqlab qolishning iloji bo’lmagan.
Ma’lum qilinishicha, jinoyatda gumon qilingan 20 yoshli ispaniyalik shaxs hibsga olingan. Qo’lga olish jarayoni o’sha shaharda keng ko’lamli qidiruv amaliyotidan so’ng amalga oshirilgan.
Gumonlanuvchi shaxs nega bunday jinoyatga qo’l urgani hozircha noma’lum, biroq u ruhiy jihatdan nosog’lom bo’lishi ham mumkinligi aytilmoqda.
Ma’lumotlarga qaraganda, gumondor bir yarim yil avval uydan qochib ketgan, natijada u qidiruvga berilgan.
