“Chelsi” bilan AQShga bormagan Kepa Arizabalaga “Real Madrid”ga qaytishni rejalashtirmoqda.
Madridliklar o’tgan mavsum Kepani bir mavsumga ijaraga olgandi. Ammo darvozabon o’zidan kutilgan natijani bermagach, “Real” Andre Luninga darvozani ishonib topshirdi. Lunin esa o’ziga yuklatilgan vazifani a’lo darajada bajarib, ajoyib mavsum o’tkazdi.
Biroq, “Real”ning asosiy darvozaboni Tibo Kurtua safga qaytgach Lunin yana zahira darvozaboniga aylanib qoldi.
Hozirgi kunda, Kepa ham Lunin ham o’zlariga yangi jamoa qidirishmoqda. O’z navbatida “Chelsi” ukrainalik darvozabonga jiddiy qiziqish bildirmoqda. Kepa esa yana bir mavsumni “qaymoqranglilar” safida ijara asosida o’tkazishga qarshi emas.
Ma’lumot uchun, ispaniyalik darvozabonning “Transfermarkt”dagi hozirgi narxi 12 million yevroni tashkil qiladi. Andre Lunin esa 25 million yevroga baholanmoqda.
