Moskvaning SSKA klubi yarim himoyachisi Abbosbek Fayzullayev faoliyatini APL’ning nomdor klublaridan birida davom ettirishi mumkin.
Gap shundaki, Angliyaning “Vulverxempton” klubi bosh murabbiyi Vitor Pereyraning yangi mavsum uchun transfer shortlisti ijtimoiy tarmoqlarga tarqalib ketgan.
E’tiborli jihati shundaki, hujumkor yarim himoyachi pozitsiyada Fayzullayevning ham familyasi bor. Lekin bu xabar hali rasman o’z tasdig’ini topmagan.
Biroq, Fayzullayev amaldagi Osiyoning eng yaxshi futbolchisi ekani, O’zbekiston milliy terma jamoasining JCh-2026 saralashidagi to’purarlaridan biri bo’lgani, SSKA bilan sovrin yutgani va futbolchi sifatida hali o’sadigan potensiali borligini inobatga olsak, bunda mantiq bor.
Ma’lumot uchun, Abbosbek Fayzullayevning SSKA bilan tuzgan amaldagi shartnomasi 2026-yilning yozida yakuniga yetadi. Uning Transfermarkt’dagi narxi 8 million yevroga baholanmoqda.
