O’zbekiston milliy terma jamoasi hujumkor futbolchisi Abbosbek Fayzullayev uchun Rossiya futbolidagi mavsum omadli yakunlandi.
SSKA safida harakat qilayotgan legionerimiz Premyer-ligada bronza medallariga ega chiqdi va kecha bo’lib o’tgan Rossiya Kubogi Superfinalida “armiyachilar” “Rostov”ni mag’lub etib, bosh sovrinni qo’lga kiritdi.
Ushbu bahsda asosiy vaqt durang natija bilan yakunlandi. G’olib penaltilar seriyasida aniqlandi. Unda omad moskvaliklarga kulib boqdi (4:3).
Hamyurtimiz Abbosbek Fayzullayev esa 73-daqiqada zaxiradan maydonga tushdi. Uchrashuvdan so’ng Fayzullayev o’zbek futbol ishqibozlariga murojaat qildi.
“Qo’llab-quvvatlagan barchaga rahmat. Xudo hohlasa, 5-iyun kuni yana bir g’alabaga erishib, Jahon chempionati yo’llanmasini qo’lga kiritamiz”.
Eslatib o’tamiz, O’zbekiston milliy terma jamoasi 5-iyun Jahon chempionati saralash bosqichi doirasida BAA’ga qarshi maydonga tushadi. Ushbu uchrashuvdagi durang natija ham bizni mundialga olib chiqadi.
