“Real Madrid” bosh murabbiyi Karlo Anchelotti “Manchester Siti” bilan o‘yin oldidan matbuot anjumanida ishtirok etdi va bugungi o’yin borasida o’z fikrlarini bildirib o’tdi.
“Fikrimcha, “Man. Siti” bugungi kunda eng kuchli murabbiyga ega bo‘lgan dunyoning eng yaxshi jamoalaridan biri. Gvardiola futbolga doim yangi taktikalar va innovatsiyalar olib kiradi. Uni juda hurmat qilaman. Dunyodagi eng yaxshi murabbiy deyish mumkin. Unga qarshi o‘ynash doim qo‘rqinchli.
Vinisius ikkita jarohatga qaramay 17 ta gol urib, kuchli mavsum o‘tkazyapti. Agar keyingi bosqichga chiqolmasak, men har qanday tanqidga tayyorman. Bizning juftlik g‘olibi turnirda uzoqqa boradi. Avvalgi mavsumlar shunday bo‘lgan.
“Siti” bilan bunday erta uchrashish biroz g‘alati. Bu yarim final yoki finalda ro‘y berishi mumkin edi. Lekin bunga faqat o‘zimiz aybdormiz.
Yana Oltin to‘p haqidami? Marosimga bormaslik noto‘g‘ri qaror emasdi. Biz Vinisius loyiq deb hisobladik. Rodri munosibmas demoqchi emasman. Uyam fantastik futbolchi. Unga avvalgi mavsum uchun berilishi kerak edi.
Himoyada Valyexo o‘ynamayotganiga sabab – uning shartnomasi tugayapti. Men yosh futbolchilarga imkon berib ko‘rmoqchiman”, – deydi Anchelotti.
Eslatib o’tamiz, “Manchester Siti” – “Real” uchrashuvi bugun, 11-fevral kuni Toshkent vaqti bilan soat 01:00 da start oladi.
