Ayni daqiqalarda AQSHning Las-Vegas shahridagi Palms Casino markazida MMA bo‘yicha LFA 203 turniri bo‘lib o‘tmoqda.
Biz uchun ahamiyatli, ushbu turnir doirasida aralash yakkakurash ustamiz Azizbek Temirov ham oktagonga ko‘tarildi. Hozirgina yakuniga yetgan uch raundlik jangda hamyurtimizga braziliyalik Daniel Arauxo raqiblik qildi.
Afsuski, to‘liq uch raund davom etgan jang yakunida hakamlar braziliyalik sportchining qo‘lini ko‘tarishdi. Arauxo hakamlarning yakdil qarori bilan ochkolar hisobiga ko‘ra g‘alaba qozondi. Uning g‘alabali seriyasi 7 ta jangga yetdi.
Ma’lumot uchun, Azizbek Temirov bugun faoliyatidagi ilk mag‘lubiyatini qabul qilib oldi. Hisobidagi g‘alabalari soni 5 taligicha qoldi.
LFA 203 turnirining markaziy jangi qirg‘izistonlik Uran Satibaldiyev hamda Braziliya vakili Leon Soaresh o‘rtasida kechadi.
