Futbol bo‘yicha Yevropa Ligasi 1/8 final bosqichi doirasidagi “Roma” — “Atletik” uchrashuvi bo‘lib o‘tdi. Qiziqarli o‘tgan bahsda Rim klubi 2:1 hisobida g‘alaba qozondi.
“Roma”ning gollariga Anxelinyo va Eldor Shomurodov mualliflik qilgan bo‘lsa, mehmonlar tomonidan kiritilgan yagona to‘p Inaki Uilyams nomiga yozildi.
Sofascore portali uchrashuvning eng yaxshi futbolchisi deya Inaki Uilyamsni topdi — 7,8 ball. Rimliklarga g‘alaba keltiruvchi gol muallifi Eldor Shomurodov esa 7,3 ballga loyiq ko‘rildi.
Maydonda 19 daqiqa harakat qilgan o‘zbekistonlik futbolchi 12 bora to‘pga tegindi. Darvoza tomon bitta aniq zarba yo‘lladi va bitta gol urishga erishdi. U sheriklariga 8 ta pas uzatgan va uning 7 martasi manzilga aniq yetib borgan. Maydonda to‘p uchun 3 marta kurash olib borgan Shomurodov 1 martasida g‘alaba qozongan.
“Roma”ning o‘yindagi eng yaxshi futbolchisi sifatida Eldorning goliga assist bergan Aleksis Salemakers topildi — 7,8 ball. Zeki Chelik esa Sofascore tomonidan 7,5 ball bilan baholadi.
Rimliklarning birinchi goli muallifi Anxelinyo 7,4 ball bilan “Roma”ning o‘yindagi eng yaxshi 3-futbolchisiga aylandi. Artyom Dovbik 6.5 ball bilan rimliklarning o‘yindagi eng yomon baholangan futbolchisi bo‘ldi.
“Atletik” safida eng yaxshi harakat qilgan futbolchi Inaki Uilyams bo‘lgan bo‘lsa (7.8), maydondan chetlatilgan Yeray Alvares eng yomon bahoga loyiq ko‘rildi — 6.3.
Ma’lumot uchun, ushbu jamoalar o‘rtasidagi javob uchrashuvi 13-mart kuni Bilbaodagi “San Mames” stadionida bo‘lib o‘tadi.
