Italiya futboli afsonalaridan biri, A Seriyaning ko’p karra chempioni Anjelo Di Livio Klaudio Ranyeri qo’l ostida “Roma” qayta shakllanayotgani va bu jarayonda Eldor Shomurodovning ishtirokiga baho berdi.
“Menga “Roma”ning “Monsa” bilan o‘yinda g‘alabaga bo‘lgan ishtiyoqi, o‘ziga xos o‘yini va yondashuvi juda ma’qul kelganini aytishim kerak. Jamoa uchrashuvni zo‘r o‘tkazdi va bundan hamma rohat oldi.
Mavsumning birinchi qismida inqirozni boshidan o‘tkazgan futbolchilar endi maydonda yana javlon urmoqda. Bunda ajoyib murabbiy Klaudio Ranyerining hissasi katta. Bu mutaxassis menga “Lester”ni qanday qilib tarixda ilk bor Angliya chempioniga aylantirganini tushuntirib berishi kerak.
“Roma”ning hozirgi tarkibi A Seriya jadvalida yanada yuqoriga ko‘tarilishga va Yevropa Ligasida bosh sovrin uchun kurashishga qodir.
Keyingi uchrashuvlarda hujum chizig‘ida Eldor Shomurodovning o‘ynayotgani juda to‘g‘ri qaror bo‘ldi. Agar men Klaudio Ranyerining o‘rnida bo‘lganimda o‘zbek futbolchisini muntazam boshlang‘ich tarkibda maydonga tushirgan bo‘lardim”, – deydi Livio.
Ma’lumot uchun, Eldor Shomurodov joriy mavsum “Roma” safida jami 23 ta o’yinda maydonga tushib, 4 ta gol urdi va 3 ta golli uzatmani amalga oshirdi.
