Olma-Otaning “Qayrat” va Londonning “Chelsi” klublari 16 yoshli hujumchi Dastan Satpayev transferi borasida kelishuvga erishdi. Bu haqda Qozog’iston klubi matbuot xizmati xabar berdi.
Manbaga ko’ra, Satpayev 2026-yilning yozida, balog’at yoshiga yetganidan so’ng rasman ingliz klubiga o’tadi. Ungacha “Qayrat” safida o’ynashda davom etadi.
“Dastan Olma-Ota shahrida tug’ilgan, sakkiz yoshida “Qayrat” akademiyasiga qo’shilgan, u yerda tayyorgarlikning barcha bosqichlarini bosib o’tgan. Dastlabki kunlardanoq mehnatsevarligi, intizomi, komillikka intilishi bilan ajralib turgan.
Dastanni faoliyatidagi eng muhim qadam bilan tabriklaymiz! Biz uning yutuqlari bilan faxrlanamiz va uni yangi marralar kutayotganiga aminmiz!
Transferni tashkil etishda yordam bergani uchun German Tkachenkoning ProSports Management agentligiga alohida minnatdorchilik bildiramiz”, – deyiladi klub xabarida.
Ma’lumot uchun, Dastan Satpayev 2024-yilning may oyida 15 yoshida asosiy jamoa safida debyut qilgan “Qayrat” tarixidagi eng yosh futbolchi hisoblanadi.
