Turkiyaning “Adana Demirspor” klubi Superliganing 23-turidan o’rin olgan ”Galatasaroy”ga qarshi o’yindagi mojaro yuzasidan bayonot berdi.
Eslatib o’tamiz, adanalik futbolchilar o’z darvozasi tomon belgilangan penaltidan norozi bo’lib, 30-daqiqada maydonni tark etgandi. O’yin to’xtatilganda hisob 1:0 hisobida istanbulliklar foydasiga hal bo’layotgandi.
“12-daqiqada jamoamiz darvozasi tomon nohaq penalti belgilandi. Shundan so’ng biz VAR aralashuvini kutdik, biroq VAR qo’ng’iroq qilmagach Turkiya futbol federatsiyasi prezidenti bilan bog’lanib, maydonni tark etishimizni ma’lum qildik.
Qarorimiz to’rtinchi hakamga bir necha bor yetkazilgandi, biroq stadiondagi shovqin sabab futbolchilarimiz bu qarorni kech eshitishdi va natijada jarayon 30-daqiqagacha cho’zildi.
Bu qaror hakamlarning tizimli va qasddan yo’l qo’ygan xatolari hamda adolatsizliklariga klubimizning javobidir. Oxirgi yillarda bo’lgani kabi joriy mavsumda ham hakamlarning adolatsiz qarorlari davom etmoqda.
Bugun sodir bo’lgan voqea nafaqat “Adana Demirspor” uchun muammo, balki butun turk futboli kelajagi boshi berk ko’chaga kirib borayotganidan dalolatdir. Bunday shov-shuvli qarorlar futboldagi raqobat ruhiga, adolat tamoyiliga jiddiy putur yetkazadi.
Biz adolatsizlik, qonunsizlik va tizimli xatolarga bosh egish niyatida emasligimizni butun jamiyatga bildiramiz. Biz qabul qilingan qaror barcha adolatsizliklarga chek qo’yadigan burilish nuqtasi bo’lishini istaymiz.
Biz klubimiz va jamoamizga beriladigan har qanday jazoni qabul qilishga tayyormiz, lekin shu bilan birga turk futboli yana bir bor kurashlarga boy va adolatli maydonlarni topishini istaymiz”, – deyiladi klub bayonotida.
