Italiya Kubogi chorak finalida “Roma” safarda “Milan”ga qarshi bahs olib bordi va yakunda 3:1 hisobida mag’lubiyatga uchradi.
Uchrashuvdan so’ng “bo’rilar” bosh murabbiyi Klaudio Ranyeri asosiy tarkibda maydonga tushgan Eldor Shomurodov haqida fikr bildirdi.
“Eldor Shomurodovdan “Napoli”ga qarshi o’yinda qanday o’ynagan bo’lsa, bu gal ham shunday harakat qilishini so’radim. Eldor Paulo Dibala bilan uch nafar yarim himoyachimiz bilan o’ynab, o’yin jarayonini boshqarib borishi talab etilgandi.
Lekin Shomurodov aynan “Napoli”ga qarshi kechga uchrashuvda juda ko’p kuch sarflab yuborgandi. Shu bois, bu gal xuddi “Napoli” bilan bo’lgan o’yindagidek harakatlarini to’liq amalga oshira olmadi. Shunday bo’lsa-da, juda yaxshi o’yin o’tkazganini e’tirof etish lozim.
Men uni ayblasam, adolatdan bo’lmaydi. Chunki Eldor zarba yo’lladi, jarima maydonchasi atrofida sheriklariga juda yaxshi uzatmalarni amalga oshirdi”, – deydi Ranyeri.
Eslatib o’tamiz, Shomurodov “San-Siro”dagi o’yinni asosiy tarkibda boshlab, ikkinchi bo’limning dastlabki daqiqalarida zaxiraga olindi.
