Madridning “Real” klubi hujumchisi Kilian Mbappe Ispaniya Kubogi doirasidagi “Selta”ga qarshi o’yinda (5:2) gol urdi va jamoa tarkibida ilgari faqat Karim Benzema erishgan kamdan-kam yutuqni takrorladi. Bu haqda MisterChip xabar bermoqda.
Manbaga ko’ra, Mbappe bir mavsum davomida o’zi qatnashgan oltita turnirda gol urdi. Benzema buni 2022/2023-yilgi mavsumda uddalagandi.
Joriy mavsumda Kilian Ispaniya chempionati, Superkubogi va Kubogi, Chempionlar ligasi, Qit’alararo kubok va UEFA Superkubogida gol urdi.
Eslatib o’tamiz, Mbappe o’tgan yozgi transferlar oynasida “Real” safiga kelib qo’shilgandi. Uning madridliklar bilan tuzgan amaldagi shartnomasi 2029-yilga qadar amal qiladi.
