Saudiyaning “An-Nasr” klubi va Portugaliya terma jamoasi hujumchisi Krishtianu Ronaldu o’zining YouTube kanalidagi bo’lajak yulduzli mehmon nomini ma’lum qildi.
“Biz internetni portlatamiz”, – deydi Krishtianu.
Xabar berilishicha, Ronalduning mehmoni mashhur bloger Mr Beast bo’ladi. Uning YouTube’dagi auditoriyasi 330 milliondan ortiq obunachini tashkil qiladi. Ronalduning kanali esa 65 million obunachiga ega.
Mr Beast ishtirokidagi premyera futbolchining YouTube kanalida bugun, 21-noyabr kuniga rejalashtirilgan.
Eslatib o’tamiz, Ronaldu 2023-yilning yanvaridan beri “An-Nasr” safida o’ynab kelmoqda. Uning saudiyaliklar bilan tuzgan amaldagi shartnomasi kelasi yilning yozida yakuniga yetadi.
