Argentinalik mutaxassis Maurisio Pochettino AQSh terma jamoasi bosh murabbiyi etib tayinlandi. Bu haqda jamoa matbuot xizmati xabar berdi.
Manbaga ko’ra, 52 yoshli Pochettino AQSh terma jamoasini 2026-yilgi Jahon chempionatiga o’z uyida tayyorlaydi.
“AQSh jamoasiga qo’shilish qarori faqat futbol bilan bog’liq emas. Bu jamoa va bu mamlakat bosib o’tayotgan yo’l bilan bog’liq. Bu yerda chinakam tarixiy narsaga erishish uchun kuch va ishtiyoq meni ilhomlantirdi.
Men iqtidor va salohiyatga ega bo’lgan futbolchilarni ko’ryapman. Biz birgalikda o’ziga xos tarix yaratamiz”, – deydi Pochettino.
Eslatib o’tamiz, argentinalik mutaxassisning so’nggi ish joyi Londonning “Chelsi” klubi edi. Maurisio “aristokratlar”ni 2023-yilning yozidan 2024-yilning may oyigacha boshqarib kelgan.
Shuningdek, Pochettino faoliyati davomida “Espanyol”, “Sautgempton”, “Tottenhem” va PSJ klublarida ham ishlagan.
