Sport xabarlarini davom ettiramiz. Okean ortidan ham sportchilarimizning gʻalabalaro ovozi yangramoqda.
Professional bokschimiz Shahram Gʻiyosov AQShda navbatdagi jangini oʻtkazdi. Ushbu bahsda hamyurtimizga meksikalik Migel Parra (22-4-1) raqiblik qildi.
10 raund toʻliq davom etgan jangda charm qoʻlqop ustamiz ochkolar evaziga gʻalaba qozondi. Qayd etish lozimki, hakamlarning ikki nafari Shahramni, yana bir nafari raqibning gʻalaba qozonganini qayd etdi.
Bu Gʻiyosov uchun professional boksdagi 16-gʻalabasi boʻldi. U 14 ta bahsda raqiblarini nakaut evaziga magʻlub etgan. Gʻiyosovning raqibi esa prof ringda 22 ta gʻalaba 4 ta magʻlubiyat va bitta durrang qayd etgan.
Shahram Gʻiyosov bundan oldingi jangini fevral oyida meksikalik boshqa bir bokschi Pablo Sezar Kanoga qarshi oʻtkazib, oʻshanda ham ochkolar evaziga gʻalaba qozongan edi.
Eslatib oʻtamiz, 4-avgust tongida yana bir charm qoʻlqop ustamiz Isroil Madrimov Terens Kroufordga qarshi jang oʻtkazadi.
