Yevropaning kuchli beshlik chempionatlarida yangi mavsum boshlanishidan oldin jamoalar o’z tarkiblarini kuchaytirishga alohida e’tibor bermoqda.
Angliya Premyer Ligasi klublari yozgi transferlar oynasida 1 milliard yevrodan ortiq mablag’ sarfladilar. “Aston Villa” Chempionlar Ligasiga qaytishga jiddiy tayyorgarlik ko’rmoqda va hozirga qadar klub 176 million yevro sarflab, eng ko’p mablag’ sarflagan jamoa bo’lib turibdi.
Sir emaski, Premyer Liga klublari transferlar vaqtida juda ko’p xarajatlar qiladi. Biroq bir transfer oynasida eng ko’p pul sarflagan jamoalar qaysi? Keling, shu haqida bilib olamiz.
Amerikalik tadbirkor Todd Beyli “Chelsi”ni sotib olganidan so’ng, klub transferlar bozorida rekord o’rnatdi. Jamoa 2023/2024-yilgi yozgi transferlar oynasida 464 million yevro sarfladi. Eng qimmat xarid Moyses Kaysedo bo’ldi (166 million yevro). Shuningdek, “Aristokratlar” ushbu transferlar vaqtida Romeo Laviya (62 million yevro) va Kristofer Nkunkularni (60 million yevro) ham o’z safiga qo’shib oldi.
Bunday tashqari, “Chelsi” ro’yxatda beshinchi va oltinchi o’rinlarda ham qayd etilgan. Jamoa 2023-yilgi qishki transferlar oynasida 330 million yevro sarflagan.
Saudiya Pro Ligasi vakili “Al-Hilol” esa o’tgan yozda 353 million yevro sarflagan holda ikkinchi o’rinni egallab turibdi. Aynan o’sha vaqtda “Al-Hilol” Neymarni o’z tarkibiga qo’shib olgan. Uchinchi o’rinni esa o’tgan yozda 350 million yevro sarflab, PSJ band qilgan. Parijliklarning o’sha vaqtdagi eng katta transferi Frankfurtdan xarid qilingan Randal Kolo Muani bo’lgan (95 million yevro).
Shuningdek, Turinning “Yuventus” klubi 2018-yilda umumiy hisobda 265 million yevro sarflagan. Eng katta xarid esa Krishtianu Ronaldu bo’lgan (117 million yevro).
Ro’yxatda kuchli o’ntalikni “Real Madrid” va “Man. Siti” yakunlab bergan.
