Yengil vazn toifasidagi Ultimate Fighting Championship (UFC)ning sobiq mag‘lubiyatsiz chempioni Habib Nurmagomedov Federal Soliq Xizmatidan (FTS) 309,7 million rubl qarzdor. Bu haqda Mash Telegram kanali xabar berdi.
Manbaga ko‘ra, may oyida qarz miqdori 306 million rublni tashkil etgan va bir oy ichida 3,5 million rublga oshgan. Federal soliq xizmati Habibning qarindoshlari hisoblarini yopgan va tekshiruvlar o‘tkazgan.
“Bizga maʼlum bo‘lishicha, soliq idoralari Nurmagomedovning amakivachchasi Umarga tegishli ikkita kompaniyadagi hisoblarni bloklab qo‘ygan. Bu — qurilish kompaniyasi va dehqonchilik fermasi. Ikki kompaniyaning qarzi — 271 rubl.
Habibning amakivachchasi Abubakarning tugatilgan ikki yakka tartibdagi tadbirkorlik firmasining umumiy qarzi — 44 kopeyka”, — deyiladi xabarda.
Qayd etilishicha, Nurmagomedov boshchiligida shug‘ullanayotgan amaldagi UFC chempioni Islom Maxachevning soliqdan qarzi yo‘q. Habibning o‘zi vaziyatga izoh bermayapti.
Habib Nurmagomedov o‘zining so‘nggi jangini 2020-yilning kuzida o‘tkazib, amerikalik Jastin Getjini mag‘lub etgan edi. Jangdan so‘ng darhol u professional faoliyatini yakunlaganini e’lon qilib, onasiga otasisiz jang qilmaslikka va’da berganini tushuntirdi. Faoliyatini yakunlagandan so‘ng, Nurmagomedov Eagle FC promouterlik kompaniyasiga asos soldi.
Bundan tashqari, u bir nechta kompaniyalarga asos solgan. Avvaliga Habib mulkdorlardan biri sifatida qayd etilgan, ammo keyin u o‘z qarindoshlari va do‘stlarini qoldirib, ta’sischilar ro‘yxatidan chiqib ketgan.
Bu Federal Soliq xizmati uchun g‘alati tuyuldi va ular tergovni boshladi. Nurmagomedovning bir qancha kompaniyalari yopildi. Masalan, “Hikmet Travel” MChJ rasmiy hujjatdagi ishonchsiz ma’lumotlar berish aybi bilan yopildi. Eagle FC kompaniyasini ham xuddi shunday taqdir kutmoqda. Uning xayriya fondi hisobi Habibning shaxsiy hisobi kabi bloklangan.
Sportchi aralash yakkakurash (MMA) bo‘yicha 29 ta jang o‘tkazib, ularning har birida g‘alaba qozongan. 2021-yilda “Ijtimoiy fikr” jamg‘armasi so‘rovi natijasida Habib sportda yil odami deb topildi. 2023-yil 22-oktyabrda Nurmagomedov jangga aloqador hamma narsani tashlab ketganini aytdi.
