Italiya A Seriyasining 31-turidan o’rin olgan bahsda “Roma” “Yuventus” bilan kurash olib bordi va yakunda Eldor Shomurodovning goli evaziga mag’lubiyatdan qutulib qoldi.
Uchrashuvdan so’ng rimliklar bosh murabbiyi Klaudio Ranyeri o’yin haqida fikr bildirar ekan, Shomurodovni nega asosiy tarkibda maydonga tushirmayotgani haqida ham aytib o’tdi.
“Artyom Dovbik va Eldor Shomurodovni ilk daqiqalardan birga o’ynatish haqida doimo o’ylab yuraman. Lekin bu har tomonlama puxta o’ylab, keyin amalga oshiriladigan ish.
Agar ularni birga o’ynatsam, Dovbikning ayrim vazifalarini Eldorga olib berishimga to’g’ri keladi. Aytib o’tishim lozim, Shomurodov boshlang’ich tarkibda o’ynashga loyiq futbolchi.
Men ikkita hujumchi bilan o’ynashni istayman, lekin o’yin davomida birortasi charchab qolsa yoki jismoniy muammolar paydo bo’lsa, ularning o’rniga kimni maydonga tushiraman?
Mana shuning uchun ham hozircha asosan faqat bir markaziy hujumchini maydonga tushiryapman. Lekin shunga qaramay, har doim faqat shunday bo’ladi, deb bo’lmaydi”, – deydi Ranyeri.
Ma’lumot uchun, Eldor Shomurodov joriy mavsum “Roma” safida jami 30 ta o’yinda maydonga tushib, 6 ta gol urdi va 3 ta golli uzatmani amalga oshirdi. Uning Transfermarkt’dagi narxi 5 million yevroga baholanmoqda.
