Xabaringiz bor, BAA terma jamoasi bosh murabbiyi Paulo Bentu lavozimidan ozod etildi.
Taniqli futbol sharhlovchisi Mirzahakim To’xtamirzayev ushbu holatga to’xtalar ekan, buni amirliklar jamoasi rahbariyati Jahon chempionatiga to’g’ridan-to’g’ri yo’llanmadan umid uzganliklari bilan izohladi.
“Menimcha, BAA terma jamoasi mundialga to’g’ridan-to’g’ri yo’llanma olishdan umidini uzdi. Sababi ular pley-off bosqichiga tayyorgarlikni boshlab yubordi. Amirliklar rahbariyati ushbu mutaxassis bilan Jahon chempionatiga chiqa olmasliklarini sezdi hamda unga chiqish eshiklarini ko’rsatib qo’ydi.
Oldinda ikkita muhim bahs bor – O’zbekiston va Qirg’iz Respublikasi. Har ikki uchrashuv ham muhim ahamiyat kasb etadi. Chunki Qatarni mag’lub etgan qo’shnilarimiz ham pley-off yo’llanmasi uchun kurash olib bormoqda.
Agar BAA qolgan ikki bahsda kerakli natijani qo’lga kirita olmasa, qolgan 2,5 ta yo’llanma uchun kurash olib borishni maqsad qilgan”, – deydi Mirzahakim To’xtamirzayev.
Ma’lumot uchun, JCh-2026 uchun Osiyo qit’asiga 8,5 ta o’rin ajratilgan. 3 ta guruhdagi 1 va 2-o’rinni egallagan jamoalar to’g’ridan-to’g’ri yo’llanma olsa, 3 va 4-o’rindagi jamoalar pley-off orqali qolgan 2,5 ta yo’llanma uchun kurash olib boradi.
