JCh-2026 saralash bosqich 8-turi doirasidagi Eron – O‘zbekiston milliy jamoalari o‘rtasidagi uchrashuv oldi matbuot anjumanida forslar bosh murabbiyi Amir G’alenoyi ishtirok etib, ertangi o’yin oldidan o’z fikrlarini bildirib o’tdi.
“Bismillahir Rohmanir Rohiym. Eng avvalo O‘zbekiston milliy jamoasiga Tehronga xush kelibsiz, demoqchiman. Fursatdan foydalanib, O‘zbekiston milliy jamoasi tibbiy shtabiga minnatdorchiligimni bildirmoqchiman. Chunki Toshkentdagi so‘nggi safarimiz chog‘ida ular bizga ancha yordam berishdi.
O‘zbekiston haqida gapiradigan bo‘lsam, so‘nggi 10 yil ichida mamlakat yoshlar futbolida ancha kuchayish va o‘sishga erishdi. Buni yuqori darajadagi o‘yinchilar yetishib chiqayotganidan ham ko‘rsa bo‘ladi. Xususan, hozir Eron chempionatida ham yuqori saviyadagi o‘zbekistonlik futbolchilar faoliyat yuritmoqda.
O‘zbekiston milliy jamoasi 3-4-3 taktikasida harakat qiladi va ertaga bizni qarshi hujumda jazolashga urinsa kerak. Biz ham yaxshi natija ko‘rsatishga harakat qilamiz. O‘zbekiston bilan so‘nggi o‘yinlardagi statistika bizning yaxshi ishtirokimizni ko‘rsatib turibdi. Ertaga stadionga ko‘plab muxlislar kelib, bizni qo‘llab-quvvatlashiga ishonaman. Gʻalaba orqali xalqimizga Navro‘z bayramiga sovg‘a tayyorlashni maqsad qilganmiz.
2026-yilgi Jahon chempionati masalasini hali rasman hal qilganimiz yo‘q. O‘zbekistondan tashqari yana ikkita o‘yin kutib turibdi. Har bir bahs o‘ziga xos tarix. O‘zbekistonga qarshi o‘yinda ham faqat g‘alaba uchun maydonga tushamiz.
Tarkibimizdagi o‘yinchilar jahon darajasidagi futbolchilar sanaladi, ular ham bahs muhimligini tushunib turibdi. Biz uchun bo‘shashmaslik, xotirjamlikka berilmaslik muhim. Hali JCh-2026ga chiqmaganimizni unutmaslik shart.
Jamoani yoshartirish jarayoni birdaniga yuz beradigan jarayon emas, bu bosqichma-bosqich amalga oshadi. Ba’zi o‘yinchilarni biz shunchaki tarkibdan chiqarib yubora olmaymiz. Ularning o‘rnini bosadigan darajadagi o‘yinchilarga hali ega emasmiz.
Mehdi Toremiyning holati? Futbolchining sog‘lig‘i – eng muhim hisobalandi. Bugun kechqurun mashg‘ulot o‘tkazgach, Toremiyning maydonga tushirish yoki tushirmaslik bo‘yicha bir to‘xtamga kelamiz. U oldingi o‘yinda BAAga qarshi bahsga tushishi mumkin edi, ammo tavakkal qilmaslikka qaror qilgandik.
Eron ayni damda FIFA reytingida 16-o‘rinda va bu tarixdagi eng yaxshi natijamiz. Bu yutuqlar so‘nggi ikki yillik mehnatimiz samarasi deb o‘ylayman. Barcha futbolchilar va Federatsiyaning mehnatini aytish lozim. Qiyinchiliklarga qaramay, yaxshi natija ko‘rsatdik, Osiyo kubogida Yaponiyani mag‘lub etdik. Endi JCh-2026 final bosqichida ham kamida pley-off yo‘llanmasini ko‘zlash lozim”, – deydi eronliklar bosh murabbiyi Amir G’alenoyi.
Eslatib o’tamiz, Eron – O‘zbekiston uchrashuvi 25-mart kuni Toshkent vaqti bilan soat 21:00 da da boshlanadi.
