Elit Chempionlar Ligasi nimchorak final bosqichi doirasida “Paxtakor” Saudiya Arabistonida “Al-Hilol” klubiga qarshi javob o‘yinini o‘tkazdi. Unda mezbonlar yirik hisobda g‘alaba qozonishdi. “Paxtakor” esa Toshkentda g‘alabaga erishganiga qaramay, musobaqani tark etdi.
Uchrashuvning ilk daqiqalarida “Paxtakor” himoyada qattiq turdi. Jonatan bir nechta xavfli zarbalarni qaytarib, darvozani sof saqlab turdi. Biroq 31-daqiqada raqibning bosimi o‘z samarasini berdi va hisob ochildi. Ikkinchi bo‘lim tugashiga 3 daqiqa qolganida Malkom “Paxtakor” posboni bilan yakkama-yakka vaziyatga chiqdi va ikkinchi golni urdi.
Tanaffusdan keyin “Paxtakor” bitta javob to‘pini kiritishi mumkin edi. Ammo “Al-Hilol” darvozaboni ajoyib seyv evaziga jamoasini qutqarib qoldi. 51-daqiqada esa Alijonov qo‘pollik ishlatgani uchun penalti belgilandi. Salim ad-Dovsariy undan samarali foydalanib, hisobni 3:0 ko‘rinishga keltirdi.
“Paxtakor” qolgan daqiqalarda hujumlar uyushtirishga urindi, ammo Xolmatov va Sergeyevning harakatlari hisobni o‘zgartira olmadi.
90+3-daqiqada “Al-Hilol” chiroyli kombinatsiya tashkil qildi va to‘rtinchi golni urdi. Shu tariqa, “Paxtakor” Elit OChL’dagi yurishini shu bosqichda yakunlashga majbur bo’ldi.
