Futbol bo‘yicha Italiya chempionati 28-turi doirasidagi “Empoli” — “Roma” bahsi bo‘lib o‘tdi. Matias Soule tomonidan kiritilgan gol rimliklarga 3 ochko taqdim etdi.
Bahsni asosiy tarkibda boshlagan Eldor Shomurodov 72 daqiqa o‘ynadi. Uning maydondagi harakatlari Sofascore tomonidan 6.5 ball bilan baholandi.
Bu vaqt davomida Shomurodov 46 marta to‘pga tegindi. 33 marta sheriklariga pas uzatib, undan 29 martasi aniq manzilga yetib bordi — 88 foiz.
Futbolchi 3 marta kalit uzatma amalga oshirdi. U maydonda 4 marta to‘p uchun kurash olib borgan, lekin hech qaysida g‘alaba qozonmadi. Eldor havodagi 3 ta kurashning 2 martasida yutib chiqdi.
Ma’lumot uchun, ushbu g‘alabadan keyin Rim klubi hisobidagi ochkolar soni 46 ta bo‘ldi va turnir jadvalida 7-o‘rinni egallab turibdi.
