Hindistonning pauerlifting sporti bo‘yicha vakilasi Yashtika Acharia mashg‘ulot vaqtida fojiali ravishda vafot etdi.
Mashg‘ulot vaqtida u ilgari ham bir necha bor ko‘targan 270 kilogrammli shtangani ko‘tarishga urinib ko‘rdi. Biroq shtangani ko‘targanidan so‘ng, u muvozanatni yo‘qotdi va og‘ir shtanga uning bo‘yniga tushib, jiddiy jarohatlarga sabab bo‘ldi.
Qizga zudlik bilan birinchi tibbiy yordam ko‘rsatildi va tez yordam chaqirildi. Ammo shifoxonada uning hayotini saqlab qolishning iloji bo‘lmadi.
17 yoshli sportchi avvalroq Yoshlar milliy o‘yinlarida g‘alaba qozongan edi. Yashtika musobaqalarda qatnashib, pul ishlab topish va oilasini qashshoqlikdan chiqarishni orzu qilardi.
Mahalliy politsiya bosh inspektorining ma’lum qilishicha, marhumaning oilasi jinoyat ishi ochish uchun ariza bermagan.
