Saudiya Arabistonining “An-Nassr” futbol klubi tijorat direktori Jordi Dyurante RIA Novosti bilan suhbatda jamoaning “Birodarlik Kubogi” turnirida ishtirok etish ehtimoli borligini ma’lum qildi.
Ushbu kubokda O‘zbekiston terma jamoasi a’zosi Abbosbek Fayzullayev to‘p suradigan “SSKA” klubi ham ishtirok etadi.
Avvalroq Moskvaning “Dinamo” klubi direktorlar kengashi raisi Dmitriy Gafin besh karra “Oltin to‘p” sohibi, portugaliyalik Krishtianu Ronaldu to‘p surayotgan “An-Nassr”ni “Birodarlik Kubogi”da qatnashishga taklif qilgandi.
“Biz doim xalqaro hamkorlik uchun imkoniyatlar izlaymiz. Rossiya — yirik bozor. Bu yerda Jahon chempionati o‘tkazilgan. Rossiyada futbolga qiziqadigan odamlar juda ko‘p. Har qanday imkoniyatni ko‘rib chiqishga tayyormiz.
Bu borada qaror qabul qilish uchun vaqt kerak, ‘An-Nassr’ taqvimida mos fursatni topish va turnirga qatnashish uchun qulay sharoitlarni yaratish lozim”, – deya qo‘shimcha qildi Jordi Dyurante.
“Birodarlik Kubogi”ning yana bir ishtirokchisi – Moskvaning “SSKA” klubi bosh direktori Roman Babayev ham “An-Nassr”ning turnirga taklif etilishini ijobiy baholadi.
Ushbu turnir 2023-yilda Serbiya va Rossiya o‘rtasida do‘stlik aloqalarini mustahkamlash uchun tashkil etilgan edi.
