UEFA kelasi mavsumlardan Chempionlar ligasi pley-off bosqichlarida ekstra-taymlarni bekor qilish masalasini ko‘rib chiqmoqda, deya xabar bermoqda The Guardian.
Nashrning yozishicha, UEFA Yevropaning klublar o‘rtasidagi eng nufuzli turnirining pley-off bahslarida uchrashuvning asosiy vaqtida g‘olib nomi aniqlanmasa, qo‘shimcha bo‘limlarga o‘tmay, bir yo‘la penaltilar seriyasiga o‘tishni istamoqda.
Qayd etilishicha, futbolchilar huquqini himoya qiluvchi FIFPro UEFAning ushbu tashabbusini to‘liq qo‘llab-quvvatlaydi. Tashkilot 15 daqiqadan iborat qo‘shimcha ikkita bo‘limlar tig‘iz taqvim vaqtida futbolchilarga og‘ir yuklamaga aylanadi, deb hisoblaydi.
Ma’lumot uchun, bu borada har qanday o‘zgarishlar eng avvalo UEFA Ijroiya qo‘mitasi tomonidan tasdiqlanishi lozim bo‘ladi. Nashrga ko‘ra, bu o‘zgarishlar qo‘mita tomonidan tasdiqlangan taqdirda ham, ikki yildan keyin joriy etilishi mumkin.
Eslatib o‘tamiz, yevrokuboklar qoidalariga so‘nggi jiddiy o‘zgarishlar 2021-yilda kiritilgan bo‘lib, unga ko‘ra mehmon jamoaning safarda urgan goliga ustunlik berilishi tizimi bekor qilingan edi.
