Moskvaning “Spartak” klubi va O’zbekiston milliy terma jamoasi sobiq hujumchisi Jafar Irismetov SSKA yarim himoyachisi Abbosbek Fayzullayevning O’zbekistonda yilning eng yaxshi futbolchisi deb topilganiga munosabat bildirdi.
“Abbos ikki yildan buyon o’z saviyasida o’ynamoqda va u mukofotga loyiq. “Lans” a’zosi Abduqodir Husanovni ham esdan chiqarmaslik kerak. Bu mukofotni birdaniga ikki kishiga berish mumkin emasligi achinarli, albatta.
Hujumkor o’yinchilar bunday e’tirofga ko’proq ega bo’lishlari aniq. Ularning ikkalasi ham yosh, shuning uchun yaqin yillar ichida ular mamlakatning eng yaxshi futbolchisi nomi uchun o’zaro raqobatlashadi.
Abbosga kelsak, u allaqachon SSKA’ning natijalariga ta’sir o’tkazmoqda, g’alabalarga katta hissa qo’shmoqda. Ayniqsa, jamoa yaxshi o’ynamayotganida. Ehtimol, oldinga intilish, Yevropani zabt etish vaqti kelgandir”, – deydi Irismetov.
Eslatib o’tamiz, Abbosbek Fayzullayev 2023-yilning yozida “Paxtakor”dan SSKA’ga ko’chib o’tgandi. Hozirda uning Transfermarkt’dagi narxi 8 million yevroni tashkil qiladi.
