Super yarimo‘rta vazn toifasida o‘z janglarini o‘tkazib kelayotgan Qudratillo Abduqahhorovning navbatdagi jangi e’lon qilindi.
Unga ko‘ra, 31 yoshli charm qo‘lqop ustamiz 15-dekabr tongida Meksikaning Tixuana shahrida tashkil etiladigan professional boks oqshomi doirasida ringga ko‘tariladi.
Abduqahhorovga o‘sha kuni meksikalik tajribali Xorxe Garsiya Peres raqiblik qiladi. Jang turnirning ikkinchi asosiy to‘qnashuvi (co-main event) bo‘ladi.
Tixuanadagi boks oqshomining markaziy jangi meksikalik Xayme Mungiya va Fransiya vakili Bruno Syureys o‘rtasida kechadi.
Ma’lumot uchun, Qudratillo Abduqahhorov (20-3-0) so‘nggi jangini may oyida gretsiyalik Andreas Kasurakisga qarshi o‘tkazib, ochkolar hisobiga ko‘ra mag‘lub bo‘lgandi. 27 yoshli Garsiya Peres faoliyati davomida 35 ta jang o‘tkazib, 31 g‘alaba, 4 mag‘lubiyat qayd etgan.
