Bugun 4 nafar bokschimiz Yekaterinburgda ringga chiqadi, Aslanov kamar uchun jang qiladi

Bugun Rossiya Federatsiyasining Yekaterinburg shahrida navbatdagi prof boks turniri tashkil etiladi. ‍
‍
Biz uchun ahamiyatlisi, ushbu turnir kardidan to‘rt nafar o‘zbekistonlik bokschining ham jangi o‘rin olgan. Oqshomning co main-event jangida ikkinchi o‘rta vazn toifasidagi charm qo‘lqop ustamiz Odiljon Aslonov WBA Asia kamari uchun rossiyalik Nikita Zonga qarshi ringga ko‘tariladi. “Premier Boxing Academy” bokschisi bo‘lib turgan Aslonov kechagi tarozi marosimida 75,8 kg tosh bosdi. Uning raqibi Nikita Zon esa 76,05 kg vazn qayd etdi. Jang 10 raunddan iborat bo‘ladi. ‍
‍
Havaskor boksda aytishga arzigulik yutuqlarga erishgan hamyurtimiz Saidjamshid Ja’farov prof boksdagi debyut jangida rossiyalik Gor Oganesyanga qarshi ringga chiqadi. Uning raqibi prof ringda 1 tadan g‘alaba, durang va mag‘lubiyat qayd etgan. 69,9 kg vazn toifasida o‘tkaziladigan ushbu jang 6 raund etib belgilangan. Buxorolik bokschimiz tarozida 70,6 kg, raqibi esa 70,9 kg vaznga ega ekani oydinlashdi.‍
‍
Yana bir bokschimiz Bobo-Usmon Baturov ham bugungi oqshomda o‘z jangini o‘tkazadi. Jizzaxlik charm qo‘lqop ustamiz prof boksdagi beshinchi jangida britaniyalik Mishel Kingga qarshi ringga chiqadi. King hisobida 6 g‘alaba (4 ta nokaut) va 2 mag‘lubiyat bor. Jang 8 raunddan iborat bo‘ladi. Baturov 68,75, King 68,9 kg vazn qayd etdi. ‍
‍
Andijonlik Shahbozbek Tolibjonov bugun prof ringdagi to‘rtinchi jangini o‘tkazadi. Yengil vazndagi bokschimiz 6 raundlik jangda tojikistonlik Asror Vohidovga qarshi ringga ko‘tariladi. Vohidov ancha tajribali bo‘lib, prof boksda 12 g‘alaba (7 nokaut) va 1 mag‘lubiyat qayd etgan. ‍
‍
Bugungi turnirning markaziy jangi Isroil Madrimovning chempionlik jangidagi sobiq raqibi rossiyalik Magomed Kurbanov hamda yana bir rossiyalik bokschi Aslanbek Kozayev o‘rtasida bo‘lib o‘tadi. Magomed Kurbanov — 72 kg, Aslanbek Kozayev — 71,8 kg tosh bosdi.