JCh-2026 saralash bosqichi doirasida O’zbekiston milliy terma jamoasi Qatarga qarshi bahs olib bordi va 3:2 hisobida alamli mag’lubiyatga uchradi.
Uchrashuvdan so’ng tashkil etilgan matbuot anjumanida bosh murabbiyimiz Srechko Katanes ishtirok etdi va o’yin borasida o’z fikrlarini bildirib o’tdi.
“Birinchi bo’limda yo’q joydan gol o’tkazib yubordik. Keyin o’zimizni o’nglab ikkita gol urdik. Bu futbol, biz oxirida gol o’tkazib mag’lubiyatga uchradik”.
Masharipovning shamollaganiga qaramay o’yinga qo’shilgani haqida:
“U yaxshi saviyadagi futbolchi bo’lganligi uchun ham uni tushirdik. U o’yinning ikkinchi bo’limida maydonga tushirishni iltimos qilgandi. Zaxira paytida men tavakkalchilikka yo’l qo’ydim”.
Jamoaning bugungi o’yini va kelajakdagi imkoniyatlari haqida:
“Qanday qilib so’nggi daqiqalarda oddiy gol o’tkazib yubordik, buni bilmayman. Ancha paytdan beri mag’lubiyatga uchramayotgan edik, shuning uchun bu muxlislar uchun og’ir. Oldimizda yana 5 ta o’yin bor”.
So’nggi daqiqalarda himoyachi tushirilib, durangga harakat qilish kerak degan topshiriq berilmagani haqida:
“Men futbolchilarga bunday demadim. Bilmayman, nima uchun bunday bo’ldi, boshqa o’yinlarda ham ko’rsangiz shunday voqealarni ko’rasiz. Bu savolga dunyoning eng kuchli murabbiylari ham javob bera olmaydi. Bunday vaziyatda futbolchilar durang natija qoniqarli bo’ladi deb o’ylashadi”, – deydi Srechko Katanes.
Ma’lumot uchun, O’zbekiston milliy terma jamoasi ushbu mag’lubiyatdan so’ng ham “A” guruhida ikkinchi o’rinda bormoqda (10 ochko). Keyingi turda vakillarimiz KXDR’ga qarshi maydonga tushadi (19-noyabr).
