Ertaga, 10-sentyabr kuni O’zbekiston milliy terma jamoasi JCh-2026 saralashi doirasida Qirg’izistonga qarshi maydonga tushadi.
Ushbu bahs oldidan tashkil etilgan matbuot anjumanida terma jamoamiz a’zosi Odiljon Hamrobekov ishtirok etdi va uchrashuv borasida o’z fikrlari bilan o’rtoqlashdi.
“Murabbiyimiz ta’kidlaganidek, avvalo mehmondo’stlik uchun minnatdormiz. Bu bosqichda kuchsiz jamoaning o’zi yo’q, shunday ekan biz ham ertangi bahsga faqat va faqat g’alaba uchun o’ynaymiz hamda o’zimiz uchun kerakli natija bilan ortga qaytishga harakat qilamiz.
Osiyo Kubogi oldidan Qirg’iz Respublikasini yirik hisobda mag’lub etganmiz, biroq o’sha bahs ikkala jamoa ham ko’proq jismoniy jihatga e’tibor qaratgan paytga to’g’ri keldi. Ertangi bo’ladigan uchrashuvimiz esa mundial yo’llanmasi uchun haqiqiy saralash o’yini bo’ladi.
Ertangi uchrashuvning ahamiyati yuqori, chunki raqibimiz o’rtoqlik va rasmiy o’yinlarga umuman boshqacha tayyorgarlik ko’radi. O’ylaymanki, murosasiz va qiziqarli bahs bizni kutib turibdi”, – deydi Hamrobekov.
Eslatib o’tamiz, O’zbekiston – Qirg’iziston o’rtasidagi uchrashuv ertaga Toshkent vaqti bilan soat 19:00 da start oladi.
