15-19-avgust kunlari futbol bo‘yicha O‘zbekiston Superligasida 16-tur uchrashuvlari bo‘lib o‘tdi.
Chempionat birinchi davrasini ko‘tarinki ruhda o‘tkazgan vodiy klublari mavsumning ekvatoriga kelib, bir oz bo‘shashib qolishdi. Mazkur tur ham vodiy jamoalari uchun ijobiy natijalarni taqdim etmadi.
Xususan, turning ilk uchrashuvida Bekobodning “Metallurg” klubi maydoniga safar qilgan Farg‘onaning “Neftchi” klubi chempionat autsayderini mag‘lub eta olmay, 0:0 hisobidagi durang natija bilan ortga qaytdi.
16-tur doirasidagi ikkinchi o‘yin Andijonda, “Bobur-arena”da kechdi. Ushbu o‘yingohda Termizning “Surxon” klubini qabul qilgan “Andijon” kutilmaganda 2:3 hisobida yutqazib qo‘ydi.
Vodiyning yana bir klubi “Navbahor” ham ushbu turni o‘z maydonida o‘tkazdi. Namangan shahridagi “Markaziy” o‘yingohda “Bunyodkor”ni qabul qilgan “Lochinlar” hakam tomonidan qo‘shib berilgan daqiqalarda penaltidan urilgan gol evaziga mag‘lubiyatdan qutulib qoldilar – 2:2.
Ta’kidlash joiz, Superliganing ikkinchi davrasi hozircha vodiy klublari uchun omadli kechmayapti.
