FourFourTwo nashri eng yaxshi terma jamoa murabbiylari reytingini tuzib chiqdi.
Reytingdan 32 nafar murabbiy joy olgan va ularning terma jamoalar miqyosida xalqaro turnirlarda erishgan yutuqlari hisobga olingan.
Ro’yxatning birinchi pog’onasini Germaniya terma jamoasining sobiq murabbiyi Helmut Shyon egallagan. Uning boshqaruvida jamoa jahon chempioni (1974) va Yevropa chempioni (1972) bo’lgan.
Shuningdek, mutaxassis Jahon chempionatida ikkinchi (1966) va uchinchi (1970), 1976-yilda esa Yevropa chempionatida ikkinchi o’rinni qo’lga kiritgan.
Bundan tashqari, Shyon Jahon chempionatida o’tkazilgan o’yinlar (25) va g’alabalar (16) soni bo’yicha murabbiylik rekordiga ega.
Ikkinchi o’rindan Italiya terma jamoasining sobiq murabbiyi Vittorio Patsso joy oldi. Uning boshqaruvida jamoa ikki marta jahon chempioni bo’lgan (1934, 1938) va 1936-yilgi Olimpiya o’yinlarida g’olib chiqqan.
Uchinchi o’rinni Ispaniya terma jamoasining sobiq murabbiyi Visente Del Boske band etgan. Uning qo’l ostida jamoa jahon chempioni (2010) va Yevropa chempioni (2012) bo’lgan.
TOP-5’likdan, shuningdek, Braziliya terma jamoasi sobiq murabbiyi Mario Zagallo (1970-yil jahon chempioni, JCh-1998da ikkinchi o’rin) va Fransiya terma jamoasining amaldagi bosh murabbiyi Dide Desham o’rin olgan (2018-yil jahon chempioni, Yevro-2016 va JCh-2022da ikkinchi o’rin).
Kuchli o’nlikka Karlos Alberto Parreyra (Braziliya), Rinus Mishels (Niderlandiya), Frans Bekkenbauer (Germaniya), Gustav Shebes (Vengriya) va Enzo Bearzot (Italiya) kiritilgan.
Reytingning 15-pog’onasidan SSSR terma jamoasining sobiq bosh murabbiyi Gavriil Kachalin o’rin olgan. Uning boshqaruvida jamoa 1960-yil Yevropa kubogida, 1956-yil esa Olimpiya o’yinlarida g’olib bo’lgan.
