Argentinalik futbolchi Anxel Di Mariya oilasiga tahdidlar bo’layotgani va Rosarioga qaytmasligini aytdi.
Shuningdek, Di Mariya o’z ona shahrida sodir bo’layotgan giyohvand moddalar savdosi va boshqa voqealar haqida gapirib o’tdi.
“U yerda ota-onam va opa-singillarim yashaydi, shuning uchun sodir bo’layotgan voqealar menga juda ta’sir qildi. Bu juda hayratlanarli. Lekin menda har doim orzu va umid bor”.
Bundan tashqari, Di Mariyaning oilasiga o’lim bilan tahdid qilishgan. Gumonlanuvchilar qo’lga olingan. Bir necha kundan so’ng esa noma’lum shaxslar “Nyuells Old Boys” rahbarining uyiga o’q uzishgan.
“Opamga tahdidlar bo’ldi. Ular peshonasida o’q bo’lgan cho’chqa kallasini qutiga solib tashlab ketishdi va agar men Rosarioga qaytsam, keyingi safar o’sha qutida qizimning boshi bo’lishini aytib, tahdid qilishdi.
Shuning uchun men Rosarioga qaytmayman. Bu oilam uchun, chunki men ularni xavf ostiga qo’ya olmayman. Men oilamning tinchligi va baxtini himoya qilmoqchiman”, – deydi Di Mariya Rosario3 telekanaliga.
Eslatib o’tamiz, 36 yoshli Jahon chempionining “Benfika” bilan amaldagi shartnomasi 1-iyul kuni yakuniga yetgan.
