Moskvaning SSKA klubi Marko Nikolichni bosh murabbiy lavozimidan ozod etdi. Bu haqda “armiyachilar” matbuot xizmati xabar bermoqda.
“Marko va uning xodimlariga bu yil uchun minnatdorchilik bildiramiz va unga kelgusi faoliyatida muvaffaqiyatlar tilaymiz!”, – deyiladi klub bayonotida.
Eslatib o’tamiz, avvalroq Abbosbek Fayzullayev SSKA safida mavsumning ikkinchi qismini boshqa pozitsiyada o’tkazgani va bu unga qiyinchilik tug’dirganini aytgandi.
“Bu mavsumni shaxsan o’zim uchun o’tgan yilgiga qaraganda yomonroq baholayman. O’tgan mavsum samaradorlik bo’yicha 5+14 ko’rsatkich qayd etgandim. Bu gal esa ko’rsatkichim 3+8 ko’rinishida bo’ldi.
Mavsumning ikkinchi qismida maydondagi pozitsiyam o’zgardi va buning natijasida o’yinimda pasayish kuzatildi. O’zgarish o’z ta’sirini ko’rsatdi.
Mavsum juda yaxshi boshlangandi, keyin o’rnim o’zgardi. Natijada statistik ko’rsatkichlar avvalgidek bo’lmadi, lekin men yangi pozitsiyaga ko’nikib olishga harakat qildim”, – degan edi Fayzullayev.
Ma’lumot uchun, Nikolich 2024-yilning iyun oyidan buyon SSKA’ni boshqarib kelayotgandi. Uning qo’l ostida jamoa Rossiya Premyer-ligasida uchinchi o’rinni egalladi va Rossiya Kubogini qo’lga kiritdi.
