JCh-2026 saralash bosqichi doirasida bo‘lib o‘tgan Eron-O‘zbekiston o‘yinidan keyin Eron matbuotida yozilgan ba’zi mulohazalarni e’tiboringizga havola etamiz.
Xususan, “Aftab News” nashri o‘zbekistonlik yarim himoyachi Abbosbek Fayzullayev sha’niga maqtov so‘zlarini yozdi.
“O‘zbekiston milliy terma jamoasining yosh yulduzi Abbosbek Fayzullayev himoyachimiz Solih Hardaniy uchun haqiqiy bosh og‘rig‘i bo‘ldi. U o‘zining keskin harakatlari va to‘pni olib yurishdagi yuqori mahorati bilan Eron milliy jamoasining himoyachisini bosim ostida ushlab turdi.
Shuningdek, maydonning chap qanotidan berilgan jarima zarbasi orqali Eron darvozasini himoyachilar va darvozabonning xatosi tufayli ishg‘ol qila oldi.
Rossiyaning SSKA klubida to‘p surayotgan 21 yoshli vinger Yevropa jamoalaridan yaxshi takliflar olgan. O‘zbekiston milliy jamoasining so‘nggi o‘yinlarida eng samarali futbolchilardan biri bo‘lib, jamoani Jahon chempionatiga yo‘l olish ostonasiga olib keldi.
U saralash bosqichida 14 ta o‘yin o‘tkazib, 4 ta gol urgan. Bu o‘zbek yulduzi o‘zining eng yaxshi o‘yinlarini Eron va Qatar kabi guruhning yetakchi jamoalariga qarshi ko‘rsatib, yosh bo‘lishiga qaramay, o‘z mamlakati uchun muhim futbolchiga aylandi.
O‘runov, Fayzullayev, Husanov va boshqa yosh yulduzlar yosh bo‘lishiga qaramay, juda yuqori sifatli o‘yin namoyish etmoqda. Bu jamoaning BAA va Qatardan yuqori o‘rin egallashi va o‘z tarixida ilk bor Jahon chempionatiga yo‘l olishi mumkinligi aslo kutilmagan holat emas.
Bu yosh futbolchilarning 2026-yilgi Jahon chempionatida ishtirok etishi O‘zbekiston futboli va uning iqtidorli o‘yinchilari uchun katta tramplin bo‘lishi mumkin”, — deyiladi maqolada.
