Madridning “Real” klubi direktorlar kengashi Ispaniya La Ligasining 22-turidan o’rin olgan “Espanyol”ga qarshi o’yinda hakamlarning chiqargan qarorlari yuzasidan Ispaniya Qirollik futbol federatsiyasiga rasmiy shikoyat bilan murojaat qildi. Bu haqda klub matbuot xizmati xabar berdi.
“Ushbu uchrashuvda bo’lib o’tgan voqealar har jihatdan inson xatosi chegarasidan oshib ketdi. Maydondagi hakamlar saviyasizlikning eng yuqori cho’qqisiga chiqdi. Ularning “Real” qarshi chiqargan qarorlari firibgarlikning bir namunasi edi. Buni e’tibordan chetda qoldirib bo’lmaydi”, – deyiladi klub bayonotida.
Eslatib o’tamiz, uchrashuvning 21-daqiqasida Vinisius Juniorning goli hisobga olinmagandi, 60-daqiqada esa hakam “Espanyol” himoyasi Karlos Romeroga Kilian Mbappega nisbatan ishlatgan qo’polligi uchun sariq kartochka ko’rsatdi.
