Kuni kecha sloveniyalik murabbiy Srechko Katanes O’zbekiston milliy terma jamoasidagi faoliyatini yakunlagandi. Mutaxassis Sloveniyaning Sportklub nashriga bergan intervyusida sog’lig’i, murabbiylik faoliyati va O’zbekiston MTJ’dan ketishi haqida gapirib o’tdi.
Manbaning yozishicha, Katanes bilan birga uning yordamchilari Aleks Chex, Nixad Peykovich va Vlado Radmanovich ham jamoadan ketadi.
“Ikki oy avval sog’lig’im yaxshi edi, hozir ham yomon emas. Ammo, baribir o’zim xohlaganimdek emas. Shu bilan birga to’shakka mixlanib qolganim ham yo’q. Tez-tez sayrga chiqib turaman. Yaratgan egam menga yordam bermoqda.
Hayotim davomida faqat boshqalar uchun harakat qilib, o’zimni fido qilgandekman. Necha marta shartnomamni bekor qilishni so’radim, ammo har safar bu fikrimdan qaytarishdi. Biroq bu meni ishlashga undaganlarning aybi emas, faqatgina o’zimning bosh murabbiy sifatidagi mas’uliyatim edi”, – deydi Katanes.
Shuningdek, Srechkoga “futboldagi faoliyatingizga nuqta qo’ydingizmi?” deb berilgan savolga hatto ertaga nima bo’lishini bilmasligini aytib, faoliyatini yakunlaganiga shama qilgan.
Eslatib o’tamiz, 61 yoshli Katanes 2021-yilning kuzidan beri O’zbekiston milliy terma jamoasini boshqarib kelayotgandi.
