Nigeriyalik bokschi Sintiya Temitayo Ogunsemilore qon tarkibida doping aniqlangani bois Olimpiada o’yinlaridan chetlatildi. Bu haqda Xalqaro test agentligi ma’lum qildi.
Agentlik ma’lumotlariga ko’ra, 22 yoshli sportchining test namunalarida ta’qiqlangan “furosemid” moddasi borligi aniqlangan. Namuna Olimpiadaning ochilish marosimidan bir kun oldin Parijda olingan.
“Sportchiga bu haqda xabar berildi va masala hal etilguniga qadar sportdan chetlashtirildi. Bu sportchiga Parij-2024 Olimpiada o’yinlari vaqtida musobaqalarda qatnashishi, mashg’ulot o’tkazishi, murabbiylik qilishi yoki har qanday faoliyatda ishtirok etishi taqiqlanganligini anglatadi”, – deyiladi agentlik xabarida.
Ma’lumot uchun, Sintiya 29-iyul, dushanba kuni 60 kg vazn toifasida ringga ko’tarilishi kerak edi.
