Professional futbol ligasi mutasaddilari hamda “Surxon” klubi rahbariyati, Surxondaryo viloyat futbol assotsiatsiyasi vakillari va viloyatning qator tashkilotlari rahbarlari Surxondaryodagi stadionda bo‘lishdi. Uchrashuv davomida maydonning 2024-yilgi mavsumda ishga tushirilishi masalasini muhokama qilingan edi.
Ayni vaqtda klub rahbariyati “Surxon” arenasini pardozlash, unga VAR texnikasini olib kelish ustida ish olib bormoqda. O‘z navbatida Liga 2024-yilgi mavsumning o‘zida bir nechta uchrashuvni Termizda o‘tkazish va 2025-yildan boshlab barcha uchrashuvlarni mazkur arenada o‘tkazish rejalarini ishlab chiqmoqda.
“Stadion bilan bog‘liq taʼmirlash ishlari sabab “Surxon” klubi bir necha mavsumni Toshkentda o‘tkazishga majbur bo‘ldi. Bu borada klub rahbariyati “Paxtakor” stadionidan foydalanib kelayotgandi. Endilikda poytaxtdagi yana 2 ta stadion Superliga talablariga moslashtirish sababi bilan yopildi. Shundan kelib chiqib, Surxon Termizdagi arena to‘liq tayyor bo‘lguniga qadar bir nechta uchrashuvni Samarqand shahridagi Dinamo stadionida o‘tkazadi”, deyiladi PFL matbuot xizmati xabarida.
Avvalroq “Lokomotiv” klubi stadion ta’miri sabab o‘zining Superligadagi uchrashuvlarini “Bunyodkor” maydonida o‘tkazilishi ma’lum bo‘lgandi.
