Shu kunlarda Niderlandiyaning Veyk an-Zeye shahrida shaxmat bo‘yicha Tata Steel Challengers-2025 musobaqasi bo‘lib o‘tmoqda.
Unda ishtirok etayotgan o‘zbekistonlik grossmeyster Nodirbek Yakubboyev 4-tur doirasida hindistonlik Rameshbabu Vayshaliga qarshi bahs olib bordi.
Odatlarga ko‘ra, shaxmatchilar o‘yin oldidan qo‘l siqib ko‘rishishadi. Ammo Nodirbek Vayshaliga qo‘l uzatmadi.
Bu ijtimoiy tarmoqlarda ko‘p muhokamalarga sabab bo‘ldi. Yakubboyevning o‘zi bu vaziyatga quyidagicha munosabat bildirdi:
“Hurmatli shaxmatchilar! Vaishali bilan o’yin oldidan sodir bo’lgan vaziyatni tushuntirmoqchiman. Ayollar va hind shaxmatchilariga hurmat bilan shuni aytmoqchimanki, men ayollarga e’tiqodim sabab tega olmayman.
Men Vaishali va uning ukasi Pragnanandhani Hindistonning eng kuchli shaxmatchilari sifatida hurmat qilaman. Agar uni xatti-harakatim bilan xafa qilgan bo’lsam, kechirim so’rayman.
Bugun (26 yanvar kuni) men bu haqda Irina Bulmagaga aytdim. U bunga rozi bo‘ldi. Ammo o‘yin zaliga kelganimda, hakamlar menga hech bo‘lmaganda “Namaste” qilishim kerakligini aytishdi.
Divya va Vaishali bilan o‘yinlarda men ularga bu (e’tiqodim) haqda o‘yindan oldin ayta olmadim va noqulay holat yuzaga keldi”, – deydi Yakubboyev.
Ma’lumot uchun, ushbu bahsda Hindiston vakilasining qo‘li baland kelgandi.
