Parij shahri mezbonlik qilayotgan Olimpiada o’yinlari guruh bosqichining dastlabki turida O’zbekiston Ispaniyaga qarshi maydonga tushdi. Deyarli tengkurashlar ostida kechgan bahsda vakillarimiz 1-2 hisobida imkoniyatni boy berdi.
Dastlab, uchrashuvning 29-daqiqasida jarima zarbasidan uzatilgan to’pni Mark Pubil golga aylantirdi (0-1). 45+3-daqiqada esa Muhammadqodir Hamraliyev raqib jarima maydonchasi ichida yiqitildi va bizning foydamizga penalti belgilandi. Ushbu imkoniyatdan terma jamoamiz sardori Eldor Shomurodov unumli foydalanib, hisobni 1-1 ko’rinishiga olib keldi.
Ikkinchi bo’lim ispanlarning ustunligi bilan boshlandi va 59-daqiqada darvozamiz tomon penalti belgilandi. Biroq Abduvohid Ne’matov ishonchli harakat qilib, jamoamizni muqarrar goldan saqlab qoldi. Oradan besh daqiqa o’tar-o’tmas “Qizil furiya” baribir o’z maqsadiga yetishdi. Uchrashuvning 62-daqiqasida Serxio Gomes hisobdagi farqni yana bittaga oshirib qo’ydi (1-2).
O’yin so’nggiga qadar hisob boshqa o’zgarmadi va O’zbekiston dastlabki turda mag’lubiyatga uchradi.
Ma’lumot uchun, Temur Kapadze shogirdlari ikkinchi turda Misrga qarshi bahs olib boradi. Ushbu uchrashuv 27-iyul kuni Nant shahrida bo’lib o’tadi.
Parij-2024. 1-tur
O’zbekiston 1:2 Ispaniya
Mark Pubil, 29 (0:1), Eldor Shomurodov, 45+3 pen (1:1), Serxio Gomes, 62 (1:2)
❌ Serxio Gomes, 59 (Ispaniya)
