1-6-avgust kunlari dunyoning eng kuchli shaxmatchilari Qozog’istonning Astana shahrida jam bo’ladi.
Rapid va blits bo’yicha Jahon chempionatida 39 jamoadan iborat 350 dan ortiq shaxmat ustasi ishtirok etadi. Mukofot jamg’armasi 350,000 yevroni tashkil qiladigan turnir ikki formatda o’tkaziladi:
Rapid: har bir o’yin uchun 15 daqiqa + har bir yurishga 10 soniya.
Blits: har bir o’yin uchun 3 daqiqa + har bir yurishga 2 soniya.
6-9 kishidan iborat shaxmatchilar jamoaviy tarzda g’oliblik uchun kurash olib borishadi. Jamoada kamida bitta ayol o’yinchi va bitta 2000 reytingga yetmagan ishtirokchi bo’lishi kerak.
Jahon reytingida 7-o’rinni band etib turgan hamyurtimiz Nodirbek Abdusattorov amaldagi chempion “WR Chess Team” jamoasi nomidan ishtirok etadi.
Shuningdek, to’rt nafar Olimpiada chempionlarimiz: Javohir Sindorov, Nodirbek Yoqubboyev, Shamsiddin Vohidov va Jahongir Vohidovlar “Royal Chess” jamoasi nomidan chempionlik uchun bahs olib boradi.
